बारामती : विद्यापीठ अनुदान आयोग, तुळजाराम चतुरचंद महाविद्यालय आणि निरामय मेडीकल व रिसर्च फाउंडेशन यांच्या संयुक्त विद्यमाने महिलांसाठी आरोग्यविषयक जाणीवजागृती कार्यशाळेचे आयोजन करण्यात आले होते.
या कार्यशाळेच्या प्रथम सत्रात सोलापूर येथील प्रसिद्ध स्त्रीरोगतज्ञ डॉ.रोहिणी देशपांडे यांनी ‘वयात येताना’ या विषयावर विद्यार्थिनींशी संवाद साधला. ‘सध्याच्या ताणतणावाच्या युगात मुलींनी शारीरिक स्वच्छता, समतोल व सकस आहार, नियमित व्यायाम व पुरेशी झोप या गोष्टींचे पालन केल्यास त्या मानसिक व शारीरिकदृष्ट्या सक्षम होतील’, असा सल्ला त्यांनी दिला. महिलांसाठी ‘चाळीशीनंतरचे आरोग्य’ या विषयावर मार्गदर्शन करताना त्यांनी स्त्रियांनी वयोमानपरत्वे बदलणाऱ्या शारीरिक रचनेकडे सकारात्मक दृष्टीने पाहावे, असा संदेश दिला.
त्यानंतर पुण्यातील अय्यंगार इन्स्टिट्यूटच्या डॉ. दीपा फाटक यांनी ‘योगा आणि जीवन’ या विषयावर बोलताना डॉ.फाटक यांनी ‘सुप्त बद्ध कोनासन’, ‘अधो मुख श्वसनासन’, ‘उत्तानासन’, ‘अर्धचंद्रासन’, ‘सर्वांगासन’ इत्यादी आसनांची प्रात्यक्षिके विद्यार्थिनी सोबत सादर केली. विशेषतः स्त्रियांच्या मेनोपोझच्या काळात करावयाच्या आसनांना त्यांनी प्राधान्यक्रम दिला.
कार्यशाळेच्या दुसऱ्या सत्रात बारामती येथील वेदना निवारण तज्ञ डॉ. कीर्ती पवार यांचे ‘हेल्दी लाइफस्टाइल’ या विषयावर व्याख्यान झाले. ‘आत्मविश्वासाने जगा, नेहमी आनंदी राहा, वेगवेगळे छंद जोपासा व स्वतःला उत्तर द्यायला बांधील रहा’ असा सल्ला त्यांनी दिला.
दीनानाथ मंगेशकर रुग्णालयातील डॉ. मयुरी मुरुमकर यांनी वाढत्या वयातील स्त्रियांच्या हाडांतील कमजोरी, सांधेदुखी, कंबरदुखी वगैरे व्याधींविषयी चर्चा केली. त्याचबरोबर स्त्रियांनी वयाच्या प्रत्येक टप्प्यावर स्वतःच्या शरीराची कशी काळजी घेतली पाहिजे याविषयी मार्गदर्शन केले.
या कार्यशाळेच्या अध्यक्षपदी महाविद्यालयाचे प्राचार्य डॉ. चंद्रशेखर मुरुमकर होते. जवळपास ६०० विद्यार्थिनी व महाविद्यालयातील १५० हून अधिक महिलांनी या कार्यशाळेत सहभाग घेतला. स्त्रियांनी प्रश्नोत्तर व संवादाच्या माध्यमातून आरोग्यविषयक अनेक शंकांचे समाधान करून घेतले. प्रमुख पाहुण्यांचे स्वागत प्रा. सीमा नाईक-गोसावी यांनी केले तर प्रास्ताविक प्रा. योगिनी मुळे यांनी केले. आभार प्रदर्शन प्रा. सुचेता दोशी यांनी केले. सूत्रसंचालन कोमल महांगडे व काजल सोनावणे या विद्यार्थिनींनी केले.